مواقع لتعلم اللغة الانجليزية دروس وتمارين وموارد مهمة

المواقع لي خص تكون عندك كأستاذ لغة انجليزية

إذا كنتي أستاذ(ة) لغة الإنجليزية فالمغرب ولا باغي تولي أستاذ(ة)، هذا أحسن منشور تقدر تشوفو فهاد نهار لخدمتك. جمعنا واحد لـFiltered list ديال الموارد والمواقع لي غاتعاونك كأستاذ، كاين مواقع لي كاتوريك كيفاش تشرح الدروس ومواقع لي كاتعطيك Worksheets والـPlanning ديال الدروس ومواقع كاتوفرلك تمارين واجدة لكل درس الخ... قسمناهم بطريقة سهلة الولوج ليكم وحيدنا جميع المواقع لي ماتصلاحش من اللائحة.

موقع Makebeliefscomix

هاد الموقع خصو يكون من Favorite ديالك. طريقة جد مبدعة فالتعليم بالإعتماد على الـComics والرسومات. ماكيهمش واش كاتعرف ترسم. علاش؟ حيت الموقع كيعطيك الشخصيات منين تختار ونتا كاتعمر لـConversation لي بغيتي وحتى لابغيتي تبدل الـSetting والملامح ديالهم الخ... منين كاتكمل يمكن تـExport الصور وتخدمها مع التلاميذ ديالك. الفكرة خصكم تجربوها حيت تقدرو مثلا تسميو الشخصيات أسماء ديال التلاميذ ديالكم وتخليوهم ديمان هكاك وفكل درس تخدم لـComics باش توصل الفكرة. وهكا حتى الدروس ماكيتنساوش. الموقع مجاني:

https://www.makebeliefscomix.com/

موقع Busyteacher

هاد الموقع فيه أكبر مكتبة ديال Worksheets تقريبا فأي موضوع وأي Skill بغيتي تخدم مع التلاميذ ديالك. فيه أكثر من 17 ألف Worksheet وكلهم قادوهم أساتذة. لي زوين فهذا كذلك هو التقسيم لي كاين فالموقع. لفوق كاتدخل لـGrammar أو Pronounciation أو حاجة بغيتي وتيعطيك داكشي بالترتيب والمواضيع منظمة. او فوق من هادشي فابور. الموقع:

https://busyteacher.org/

Classdojo

هذا موقع ومعاه تطبيق. هاد الموقع بالضبط خدامين بيه المئات ديال المدارس الخاصة خارج المغرب ولكن للأسف مامعروفش عندنا فالمغرب مع الأساتذة والتلاميذ. كيصلاح بزاف لـKids ولكن كاطورو الموقع باش يولي كيدعم المستويات الأخرى. هذا داير على شكل Community بحيت أنه منين كيحمل التلاميذ ديالك التطبيق كاتولي تشوف الدروس لي كاتعلمو وشحال جابو فـTests لي خداو وفين غلطو الخ... بل كيعطيك حتى اقتراحات شنو خصك دير مع كل تلميذ وفين كاين عندو الضعف. هادشي كيزيد يزيان حيت فيه شخصية Dojo لي كاتمشي مع التلاميذ ديالك على طول الدروس فحالي راهم كيتفرجو ففيلم أو كيلعبو لعبة. مجاني:

https://www.classdojo.com/

موقع Cambridgeenglish

منين غاتدخل الموقع مغادي يبانلك والو فالأول داكشي لاش ماتمشيش تقلب عليه غير هكاك. كاين واحد الرابط مخصص للأساتذة مخبي شوية ولكن غير كاتفتحو تيعطيك أكبر عدد ممكن ديال الإختيارات حسب شمن مستوى كاتقري. كاتعزل المستوى وكاتعزل شنو بغيتي تقري واش الإنجليزية العامة ولا IELTS ولا لـBusiness الخ... وحتى شمن مهارة بغيتي تخدم عليها. الموقع مجاني:

https://www.cambridgeenglish.org/teaching-english/resources-for-teachers/

موقع One Stop English

هاد الموقع غدار من الشوفة ديالو كاتحگرو ولكن هاد الموقع تقدر تعتابرو فحال المرجع ديالك اليومي د الأخبار. لي مميز فهذا هو تيدخل الأخبار نيت فالواجهة ديالو. هاد الأخبار تيعزلوهم أساتذة بحيث أن اللغة المستعملة مكاتكونش صعيبة ويمكن ليك تخدمهم فالقسم ديالك. فوق من هادشي الموقع عامر بلـLesson planning ديال مختلف الدروس. ولكن لي غادي يفاجئك هو كاينة واحد section سميتها الـMethodology وتما غاتلقا أساتذة كيتكلمو على التجارب ديالهم وكاتبين مقالات على كل طريقة وأسلوب تعليم. لدرجة أنه مؤخرا كاين لي بدا كيوري الأستاذة كيفاش يخدمو Instagram باش يعلمو التلاميذ ديالهم (ماشي posts) يعني تستعمل شي حاجة محبوبة عن التلاميذ لأغراض تعليمية. الموقع مجاني:

http://www.onestopenglish.com/

موقع Teachingenglish

هاد الموقع تابع لـBritish Council. لي نصحوك تستعمل هاد الموقع بيه هو منين تدخل ليه، سير لواحد القنت فاليمين سميتو Popular. تما تيكونو مواضيع الساعة. منين كاتختار شي موضوع كاتلقا صفحة كاتشرح ليك كيفاش تخدم مع التلاميذ الدرس والصور لي تستعمل وكلشي واجد ناضي فـPDF أو حتى Doc إذا بغيتي تEdit داكشي على حسب هواك. الموقع مجاني ولكن غاتحتاج تسجل (ساهل):

https://www.teachingenglish.org.uk/article/learning-home

موقع Esl-jobs-forum

هذا forum ليك إذا كنتي كاتقلب على خدمة Online ولا حتى Offline. شحال من مؤسسة فالخارج كاتحط العروض ديالها هنا ويمكن ليك تكلم معاهم ويقدرو يتكلفو هوما بالمصاريف كاملة إذا لقاو عندك شنو بغاو. لكن بالنسبة لينا لي حسن من هادشي هو الشبكة لكبيرة ديال لـusers لي كاتيحلك تواصل مع أي أستاذ ويعاونوك بنصائح كيفاش تصوب CV ديالك أو كيفاش تحط الطلبات أو منين تاخد Certificates... غير لي مابغاش. الموقع مجاني:

https://www.esl-jobs-forum.com/

موقع ESL Library

هاد الموقع فيه جزء مجاني وجزء مدفوع. يستاهل حيت كيف نيت الإسم تيقول Library راه شبه Library. نقدرو نقولو بلي لي مخير فهاد الموقع هو التنظيم لي فيه حسن من أي وقع حطيناه فهاد ليست كاملة. الموقع كذلك أنيق فحالي راك دخلتي لـInstagram ولا Facebook خاص غير بيك نتا. الدروس واجدة وفنفس الوقت إذا بغيتي تبدل شي حاجة فيها ماتحتاش تحملها عاد تبدل. الموقع فيه Built-in خيارات لي كاتسمح ليك تصوب لي بغيتي وكأنك نتا لي مصوب الدرس كامل وعاد ديك ساعة تحملو. يمكن ليك تطلق منو Live للتلاميذ ديالك وخفيييف فالخدمة. تيعطيك Cloud ديالك لابغيتي تجمع الدروس ولا صور ولا فيديوهات ولا تسجل دوك لايفات لي درتي الخ... هادشي كاامل بـ70 درهم للشهر. يعني لا شيء مقارنة مع شنو تيوفر ليك:

https://esllibrary.com/

موقع Reddit

ريديت موقع مشهور عالميا عبارة عن Hub ديال الـForums يعني هو براسو جامع بزاف ديال Communities على حسب شنو كيهتمو بيه. فيه الـCommunity ديال الأساتذة د الإنجليزية. هذا كانصحو بيه الأساتذة لي باغين يقريو من الثانوي لفوق وماشي للأطفال. هنا غاتلقا بزاف د الناس فحالك عندهم مشاكل فالقسم بغاو يحلوها. كاتلقا أستاذة خبراء من مختلف العالم كيجاوبو على هاد الأسئلة. وكون هاني مكاينش الأسئلة الغير مفيدة حيت أصلا إذا كانت مغاديش تطلع لفوق ومغاديش يجاوبو عليها الناس:

https://www.reddit.com/r/ELATeachers/

موقع Writeandimprove

هذا غالبا مغاتكونش عارفو وغالبا خصك تعرفو. هذا خاص بالكتابة فقط ولكن فيه شي حاجة مكاينة فحتى موقع اَخر... التصحيح ! عطي لتلاميذ ديالك موضوع من المواضيع لي كاينة وقول ليهم يكتبو الموضوع ويحطوه فهاد الموقع عندك نتا. الموقع هو لي غادي يصحح الكتابة ديالهم ويعطيهم النقطة ويقولك شنو ناقصهم وفين الأخطاء. نتا ديك ساعة يمكن تشرح للتلاميذ ديالك فين غلطو وتقاد الأمور:

https://writeandimprove.com/

وهنا غانكونو كملنا اللائحة ديال أحسن المواقع ليك نتا كأستاذ لغة إنجليزية. مزال غانحطو فحال هادشي فالمقالات القادمة. عطينوا موارد أخرى إذا كانت عندكم فالكومنتس

المصدر : EasyGlish